కౌండిన్యసగోత్ర సంకలితుఁడాపస్తంబసూత్రండు పుణ్యుండు సుభగుఁడైన
భీమన మంత్రికిఁబ్రియపుత్రుఁడన్నయ కలకంఠి తద్భార్య గౌరమాంబ
కమలాప్తు వరమునఁగనిన సోమనమంత్రి వల్లభ మల్లమ వారి తనయు
డెల్లిన యతనికి నిల్లాలు మాచమ వారి పుత్రుఁడు వంశ వర్ధనుండు
ఆటవెలది
లలిత మూర్తి బహుకళానిధి కేసన, దానమాననీతిధనుఁడు ఘనుడు
తనకు లక్కమాంబ ధర్మగేహిని గాఁగ, మనియె శైవశాస్త్రమతము గనియె
1-23. కందము
నడవదు నిలయము వెలువడి, తడవదు పర పురుషు గుణము దనపతి నొడుపున్
గడవదు వితరణ కరుణలు, విడువదు లక్కంబ విబుధ విసరమువొగడన్
1-24. ఉత్పలమాల
మానిను లీడుగారు బహుమాన నివారిత దీనమానస
గ్లానికి దానధర్మ మతిగౌరవ మంజులతాభీరతా
స్థానికి ముద్దసానికి సదాశివపాదయుగార్చనానుకం
పానయ వాగ్భవానికిని బమ్మెర కేసయ లక్కసానికిన్
1-25. కందము
ఆమానిని కుదయించితి, మేమిరపుర మగ్రజాతుఁడీశ్వర సేవా
కాముఁడు తిప్పయ; పోతయ నామవ్యక్తుండ సాధునయయుక్తుండన్
1-26. వచనము
అయిన నేను నా చిత్తంబునఁ బెన్నిధానంబునుం బోని శ్రీరామచంద్రుసన్నిధానంబుఁగల్పించుకొని
* * *
